文／曾秋仁
臺中市北新國中主任退休。現任台中市客家事務委員會委員、台中市客家語教師協會總幹事、台中市國中小客語薪傳師（四縣腔）。
𠊎盡記得頭擺做細人仔个時節，歇个伙房屋，雖然有花園、涼亭，還有半月形个陂塘。在該搞囥人尋時，實在當暢樂；毋過，想愛屙屎个時節，就會目結結仔，因為便所就在豬欄脣，豬仔噦噦滾，豬屎又臭肨肨仔，實在鼻毋贏。跍到屎缸頂該下，低頭就看著屎缸下一大棚个屎，屎肛蟲蠕蠕動，看著就雞嫲皮膨膨起。
恁樣个回想嗄分𠊎聯想著東晉丞相王導个叔伯阿哥王敦（266年—324年）个故事。佢正討公主該下，歇在皇宮，愛去便所時，看著漆箱肚，裝等淰淰个棗仔乾。這棗仔乾本來係在便所，愛用來塞鼻公用个；王敦毋知，話著皇宮肚个便所，也有零 嗒好食，就食起來。使女看著，通體揞嘴偷笑。可見便所个臭羴，自古以來就當搣耍人。
到19世紀个時節，霍亂大流行，全世界死忒當多人。若係分著著（cog doˋ）霍亂个病人，屙痢肚抑係翻出來个屙糟東西汙染著，就會遰著病；續等會屙瀉屙無停，就漸漸全身無力，毋會停動，無幾久就消忒咧！
背尾20世紀初，政府開始推動便所衛生。到這下家家戶戶都有抽水馬桶。抽水馬桶个原理主要利用「虹吸作用」。撳下水箱肚个水該下，馬桶底「S」型个彎水管个水，流水速度當遽、等水管內水足時，就會在水管肚產生強大个力量，將馬桶內个屎尿摎水，共下嘬入水管，過排入下水道。 沖水過後，虹吸作用就停忒咧，水箱會再過流入淰淰个水，該下馬桶彎管內个水，就形成「水封」，來阻擋下水道个屎尿臭氣湧上來。
俚實在異幸福，享受科技創新个便利環境。毋過，科技創新有好有壞兩個面相。像手機仔壽命當短，加上科技公司逐年都會推出新个型號，餳人去買，就製造出ㄧ大堆个電子垃圾。
電子垃圾嚴重影響人類个康健，因為該燒出个毒氣，會汙染空氣、大地、河壩水。恁樣會引起敨氣、神經系統个問題。還會破壞環境，分臭氧層變到越來越薄。臭氧層係消失，紫外線會直接照射到地球表面，影響 俚个日常生活，甚至引起當多癌症。
大家愛手牽手，共下來保護環境，恁樣正做得平平安安，過幸福个日仔。
華語
我非常記得小時候，住的伙房屋，雖然有花園、涼亭，還有半月形的水池，在玩捉迷藏時，實在過癮；不過，想要大便時，就會愁眉苦臉，因為廁所在豬圈旁，豬仔吱吱尖叫，豬糞又臭氣沖天，實在受不了。蹲到糞坑上，低頭就看到糞坑下一大片的大便，蛆不停鑽動，看著全身就起了雞皮疙搭。
這樣的回想，卻聯想到東晉丞相王導的堂兄王敦（266年—324年）的故事。他剛娶公主時，住在王宮，要去廁所時，看到漆箱裡，裝著滿滿的棗子乾。這棗子乾本來放在便所邊，是用來塞鼻子用的；王敦不知，以為宮中的廁所，也有零食好食，就吃起來。婢女看到，全都掩嘴偷笑。可見廁所的臭味，自古以來就非常惹人厭。
到19世紀時，霍亂大流行，全世界死了很多人。如果給霍亂病人拉肚子或吐出來的髒東西污染到，就會染病，接著會不停上吐下瀉，漸漸全身無力，不能行動，沒多久就死了！
到20世紀初，政府開始推動廁所衛生，到現在家家戶戶幾乎都有抽水馬桶。抽水馬桶的原理主是利用「虹吸作用」。當按下水箱裡的水開關時，馬桶底「S」型彎水管的水，流水速度很快，等水管內水滿時，就會在水管內產生強大的吸力，將馬桶內的屎尿和水，一起吸入水管，並排入下水道。 沖水過後，虹吸作用就停止，水箱會再流入滿滿的水，那時馬桶彎管內的水，就形成「水封」，來阻擋下水道的屎尿臭氣湧上來。
我們實在很幸福，享受科技創新的便利環境。不過，科技創新有好有壞兩個面相。像手機仔壽命很短，加上科技公司逐年都會推出新的型號，誘人去買，就製造出ㄧ大堆的電子垃圾。
電子垃圾嚴重影響人類的健康，因為那燒出的毒氣，會污染空氣、大地、河壩水。這樣會引起呼吸、神經系統的問題；還會破壞環境，使得臭氧層變得越來越薄。當臭氧層消失，紫外線會直接照射到地球表面，影響我們的日常生活，甚至引起癌症。
大家要手牽手，一起來保護環境，這樣才能平平安安，過著幸福的日子。