文／邱秀坊，客語薪傳師，係屏東客家人，這下歇板橋，邱鴻春先生指導客語寫作（南四縣腔）
正經「家有一老，當過一寶」，𠊎等阿姆，今年97歲，係𠊎等家族、兄弟姐妹个精神寄託。阿姆安著邱曾雪英，冠夫姓，係傳統个客家妹仔，莊仔項人喊佢鎮祥嫂。
阿姆在日本時代出世，當時鄉下盡少人讀書，但係外阿公注重細人仔教育，阿姆讀淑徳女中（省立潮州中學个前身）。算來阿姆有好家世，外阿公有一大槓个田，在該央時算係大戶人家。
21歲由媒人婆牽成，嫁分美崙村邱來發个單丁子邱鎮祥，上有家官、家娘，下有四個吂嫁个小娘姑，聽吾姑講：阿姆嫁過來後，做到腰箝背吊，蒔田割禾、挲草、交工⋯⋯逐日做到兩頭烏，細人仔連等出世，像梯排高高低低，佢ㄧ肩㧡起做心臼、做阿姆个責任。
三姑丁菊同𠊎等講：做村長个阿公，因爭同朋友做擔保，分人連累著，原本當發个家產，一塊塊个田坵土地割讓分債主！好得阿爸食公家飯，還做得顧著三餐，但係所有个事頭全矺在阿姆肩頭，教養大細、做田事，阿姆正經係齧等牙根，含等目汁，艱耐承受苦無怨嘆，為著家庭圓滿。
春天變成寒沁沁个冷天，家道中落後，屋家毋得天光、毋得日出，負債過日仔，邱家經過這大打擊，阿公嗄操煩慍悴發病過身，正經係屋漏又堵連夜雨，阿婆又得著老人失智，無法照顧自家个生活！阿姆擔頭緊來緊重，矺到佢敨毋出氣，佢照樣日日夜夜親身侍奉湯藥、飼三餐、清淨阿婆个屎尿，定時翻身、做復健，照顧到盡週到，孝行感動隔壁鄰舍，大家都講愛同鎮祥嫂做模範。
當多親戚朋友，來到屋家，目珠黏時看著，客廳有三塊屏東縣政府頒發个獎狀、牌匾，一塊係阿爸个「嚴教慈範」（1998年），另外二塊係阿姆个，分別係1979年「模範忠孝子媳」獎狀摎1991年「宏揚母教」獎牌，阿姆个孝行傳遍全美崙村。
阿姆後生時，學過做衫服个手藝，不但會做衫服，還盡會煮食，手路菜係封肉，用烘爐仔燜出來个豬肉酪又香，一家封肉歸莊香，一挾啊出來口涎水就溚溚跌，該係歸家人幸福个味緒。還過麻油雞酒，乜係𠊎等細人仔最好食个，逐擺歸屏東，阿姆定著會煮一鑊麻油雞酒分𠊎食，食著感動心暖。
阿姆个身教，深深影響𠊎等，𠊎等這兜細人仔，有樣學樣，儕儕出外讀書，成家立業。如今六個子女，有兜退休，有兜還在該上班，大家有閒，連孫仔、息嫲，乜輒輒轉屋家看阿婆、阿太，這擺過年帶等全家人轉屏東，阿姆看著大細轉來當暢，牽等細息嫲个手，緊摸緊㖸，「一人有福，牽帶滿屋」。看著四代同堂，溫馨、歡樂个幸福畫面，𠊎正經感覺著，有阿姆个細人仔像隻寶
華語
真的「家有一老，如有一寶」，我們的媽媽，今年97歲，是我們家族、兄弟姐妹的精神支柱。媽媽叫做邱曾雪英，冠夫姓，是傳統的客家妹，村莊的人叫她鎮祥嫂。
媽媽出身在日治時期，當時鄉下很少人讀書，但是外公注重小孩子教育，媽媽讀淑徳女中（省立潮州中學前身）。算來媽媽有好家世，外公有一大片的田，在當時算是大戶人家。
21歲由媒人做媒，嫁美崙村邱來發獨生子邱鎮祥，上面有公公婆婆，底下有四個未出嫁的小姑，聽我姑姑說，媽媽嫁過來後，做到腰酸背痛，插秧割稻、除草、交工⋯⋯每天從早忙到晚，實在很辛苦，小孩子連著出世，好像樓梯高高低低，她ㄧ肩挑起做媳婦、做媽媽的責任。
三姑丁菊跟我們說，做村長的爺爺，因為跟朋友做擔保，被人家連累到，原來很富裕的家產，一塊塊的田地土地割讓給債主！還好爸爸吃公家飯，還可以照顧三餐，但是所有的事情全壓在媽媽身上，教養小孩、做農事，媽媽真的是咬緊牙關，含著眼淚，忍耐承受苦沒有怨恨悲嘆，為了家庭圓滿。
春天變成寒冬，家道中落後，家裡幾乎不見天日，負債過日子，邱家經過這大打擊，爺爺又操心煩惱心情很鬱悶生病逝世，真的是屋漏偏逢連夜雨，祖母又得到老人失智，沒辦法自理生活！媽媽的擔子越來越重，壓著她喘不過氣，她照樣白天晚上親身侍候服侍吃藥、餵三餐、清理祖母的大小便，定時翻身、做復健，照顧到很週到，孝行感動鄰居，大家都說要跟鎮祥嫂做模範。
很多親戚朋友，來到家裡，眼睛馬上就看到，客廳有三塊屏東縣政府頒發的獎狀、匾額，一塊是爸爸的「嚴教慈範」（1998年），另外二塊是媽媽的，分別是1979年「模範忠孝子媳」獎狀跟1991年「宏揚母教」獎牌，媽媽的孝行轟動全美崙村。
媽媽年輕時，學過做衣服的手藝，不但會做衣服，還很會煮菜，拿手菜是紅燒肉，用烘爐燜出來的紅燒肉煮到很熟爛又很香，一家燒肉全村香，一挾口水就一直滴，那就是全家人幸福的味道。還有麻油雞酒，也是我們小孩子最喜歡吃的，每次回屏東，媽媽一定會煮一鍋麻油雞酒給我吃，吃到感動心暖。
媽媽的身教，深深影響我們，我們這些小孩子，有樣學樣，每個人都出外讀書，成家立業。到現在六個子女，有的退休，有的還在上班，大家有空，連孫子、曾孫子女，也常常回家看祖母、曾祖母，這次過年帶全家人回屏東，媽媽看著全家大小回來很高興，牽著小孫女的手，一直摸一直笑，「一人有福，帶動全家人」。看到四代同堂，溫馨、歡樂的幸福畫面，我真的感覺到，有媽媽的孩子像個寶。