文／李文煥，苗栗縣客家人，國中特教教師，現下戴苗栗（四縣腔）。
在家鄉个各學校巡迴教書，係𠊎平常時个頭路，乜係𠊎心肝肚个使命。視力上个限制，分大眾運輸變做𠊎最倚恃得个伴。坐等山線、海線火車上上下下，再過盤公車、接駁車出出入入，𠊎來回在苗栗个街頭巷尾，看等窗門外背風景流轉，心情也隨等變化。巡迴教書雖然辛苦，毋過𠊎相信一分耕耘，總會有一分收成。
頭下碼走巡迴該幾年，𠊎識欣羨該兜做得固定在學校裡背教書个先生，毋使滿哪仔碰上碰下，定疊个生活正經還好那！毋過，𫣆俚總係愛正向思愐，換隻角度來想「船到灘頭水路開」，逐日坐車仔敢毋係就像遶尞，歸路仔還做得欣賞風景呢！係講在固定个學校肚，又仰般會有𠊎這「屙屎合挖芋」个閒情自在呢？
今晡日係驚喜連連个日仔，打早苗栗冷咻咻仔个天時，乜影響著𠊎个手腳行動，出門時間比往擺小可慢幾分鐘。愛赴得著7點19分个火車，就像係同時間走相逐共樣。為著無愛誤著巡迴教學第一節个課，𠊎揹等裝淰教具重鈂鈂个書包仔，氣急急仔連走帶飆，像一隻大肚蛤蟆樣仔向前舂等去車頭。毋過，天公總係搣耍𠊎，𠊎目金金仔看等火車門在頭前合起來，啊！仰結煞正好，無赴著該枋做得坐7點30分到竹南个火車。
慍悴个心情躍上心頭，兩支腳髀乜開始抗議，提醒𠊎這隻中年發福个阿伯應當愛增加運動量了。好得愐起老古人講：「跌倒三擺，就愛三擺企起來。」煞煞拿手機仔查時間表，看係做得赴著下一枋火車，抑係將就使錢來去坐計程車。好彩，十分鐘過後，另一枋區間車定定仔駛入來，分𠊎順利到竹南火車頭盤車，包尾還係準時到頭份个六合國小。
毋過，驚喜毋係到這就結束，正踏入資源班教室，兩隻特教先生就同𠊎講：「今晡日朝晨學校愛進行防災演習，可能會影響你上課哦！」𠊎笑等回應：「無關係！無關係！這種經驗𠊎長透堵著，等該下就陪學生共下去防災演習就好了！」警報聲響起，𠊎先𢯭手視障學生跍入桌仔下，再過陪佢從四樓行到一樓个空跡，同全校師生共下跍等。跍下去該央時，𠊎正深深感受著自家中年發福个程度，脛脛个肚屎害𠊎險險打倒𢫦，實在還孤盲那！
續下來，下晝个課係山肚个田美國小，人講：「遠路無輕擔」實在有影，坐上10點10分个苗栗客運，對竹南出發向南庄入去，足足經過七十分鐘个搖啊搖，總算到了學校脣項「田美變電所」站牌。這係一間十分靚个校園，𠊎在圖書館等學生仔來上課，吂知打鐘仔過忒五分鐘，還無看著學生仔个影跡，遽遽打電話聯絡班導師，先生聲哨打尖喊：「啊！敗勢，文煥先生！𠊎毋記得摎你講，今晡日阿祐仔公假去參加野球比賽了！實在敗勢呢！」
換做係頭擺正入這行个時節，𠊎定著會試著心情當壞，好得今下，𠊎既經係一隻身經百戰个「老鳥精」了。𠊎笑笑仔講：「無關係！無關係！學生參加比賽當重要，這種臨時个狀況當正常，先生你毋使掛心。」這一日雖然起起落落，毋過乜有無想著个歡喜，也分𠊎過加一擺感受著，巡迴教書雖然辛苦，但係也滿哪仔都有挑戰同樂趣。
華語
在家鄉的各個學校巡迴教書，是我的日常工作，也是我心中的使命。視力上的限制，讓大眾運輸成為我最依賴的夥伴。搭乘山線、海線火車來來回回，再轉乘公車、接駁車進進出出，我在苗栗的街頭巷尾穿梭，看著窗外風景流轉，心情也隨之變化。巡迴教書雖然辛苦，但我相信一分耕耘，總會有一分收穫。
剛開始跑巡迴的那幾年，我曾經羨慕那些可以固定在學校裡教書的老師，不用到處奔波，穩定的生活真是令人嚮往！不過，我們總是要正面思考，換個角度想「船到橋頭自然直」，每天搭車難道不就像在遊覽，沿途還可以欣賞風景呢！如果在固定的學校裡，又怎麼會有我這「悠閒自在」的閒情逸致呢？
今天是一個驚喜連連的日子，清晨苗栗冷颼颼的天氣，也影響了我的手腳行動，出門時間比平時慢了幾分鐘。為了趕上7點19分的火車，就像在和時間賽跑。我背著裝滿教具沉甸甸的書包，氣喘吁吁地連走帶跑，像一隻大肚蛤蟆一樣向前衝向車站。不過，老天爺總愛捉弄我，我眼睜睜地看著火車門在眼前關上，啊！怎麼辦才好，沒趕上那班7點30分到竹南的火車。
沮喪的心情湧上心頭，雙腿也開始抗議，提醒我這個中年發福的阿伯應該要增加運動量了。幸好想起老人家說：「跌倒三次，就要三次站起來。」趕緊拿出手機查時刻表，看能不能趕上下一班火車，或是乾脆花錢搭計程車。幸運的是，十分鐘後，另一班區間車緩緩駛入，讓我順利抵達竹南車站轉車，最後還是準時到達頭份的六合國小。
不過，驚喜還沒結束，剛踏入資源班教室，兩位特教老師就告訴我：「今天早上學校要進行防災演習，可能會影響你上課喔！」我笑著回應：「沒關係！沒關係！這種經驗我常常遇到，到時候就陪學生一起去防災演習就好了！」警報聲響起，我先協助視障學生躲到桌子底下，再陪他從四樓走到一樓的空地，和全校師生一起蹲下。蹲下的時候，我才深深感受到自己中年發福的程度，圓滾滾的肚子害我差點向後仰到，實在太糗了！
接著，下午的課在山裡的田美國小，俗話說：「遠路無輕擔」是真的，搭上10點10分的苗栗客運，從竹南出發往南庄，足足經過七十分鐘的搖晃，總算抵達學校附近的「田美變電所」站牌。這是一間非常美麗的校園，我在圖書館等學生來上課，沒想到打鐘五分鐘後，還沒看到學生的蹤影，趕緊打電話聯絡班導師，老師尖叫地說：「啊！抱歉，文煥老師！我忘記告訴你，今天阿祐公假去參加棒球比賽了！真是不好意思！」
換作是剛入行的時候，我一定會覺得心情很糟，幸好現在，我已經是身經百戰的「老鳥」了。我笑笑地說：「沒關係！沒關係！學生參加比賽很重要，這種臨時狀況很正常，老師你不用掛心。」這一天雖然起起落落，但也有意想不到的驚喜，也讓我再次感受到，巡迴教書雖然辛苦，但到處都有挑戰和樂趣。