文／謝孟均，學生，苗栗頭屋人，這下戴苗栗頭屋（四縣腔）
老古人言講：「人愛尞，菜愛尿」，每儕人都需要分自家放輕鬆个時節，有人好去釣魚仔，有人好去唱歌跳舞，𠊎係中意畜魚仔同細蝦公，𠊎試著這係一件當有挑戰性又生趣个休閒活動哦！
畜魚仔毋係一件恁該个事情，記得還細个時節，𠊎个阿爸帶等𠊎去屋下附近个伯公下拜喏，堵好脣頭有井水同一窟魚塘，𠊎行兼去看發現裡肚有花剌必駁色目个孔雀魚在該泅來泅去，𠊎試著當得人惜，黏時就去拜託阿爸分𠊎畜魚仔，阿爸也當遽轉屋下拿出撈仔，撈幾下就看著掖麻掖米个魚仔泅啊來泅啊去，歸點鐘過去咧，正撈著幾十尾正經無簡單，無想著還較難个係畜魚仔，因爭畜魚仔之前愛先「養水」，係無，撈較多魚仔也係菜籃㧡水——無採工。果不其然，畜了無幾久原本靚靚个魚仔全部都貶肚咧。
有了這擺失敗个經驗𠊎正知愛準備過濾器、硝化菌，畜魚个水愛先分日頭晒，分氯散忒，做毋得儘採，「若愛學問好，必先問三老」做學問恁樣，畜魚仔也係恁樣，好得水族館个頭家娘有教𠊎仰般養水同畜魚仔，加上發達个網路資訊，𠊎慢慢仔畜出心得，後背還有畜蝦公甚至有畜過龜仔，毋過啊有時節寒流來較耐畜个魚仔也會貶肚，熱天忒熱也會有影響，畜魚仔乜愛看天公伯个心情。
這下𠊎畜个魚仔係目前為止盡耐畜个魚仔「蓋斑鬥魚」，係台灣原生種，較毋會因為天時變化大講貶肚就貶肚，還過雖然比毋上孔雀魚个外表恁靚恁好看，毋過佢嗄有堅強个生命力，就像𫣆兜客人有硬頸又堅強个精神毋驚艱難，煞猛打拚，有自家个一片青天。
畜魚仔雖然毋簡單，毋過淨愛有耐心，毋驚失敗𠊎相信大家也做得當遽就學會了，畜出自家个心得哦！
華語
客家諺語云:「人愛尞，菜愛尿」，每個人都需要給自己放輕鬆的時候，有人喜歡去釣魚，有人喜歡去唱歌跳舞，我則是喜歡養魚養蝦，我認為這是一件很有挑戰性又有趣的休閒活動喔！
養魚不是一件很容易的事情，記得還小的時候，我的爸爸帶著我去家附近的伯公廟拜拜，剛好旁邊有井水和一座魚塘，我走進看發現裡面有五顏六色的孔雀魚在那游來游去，讓我覺得很可愛，馬上就去拜託爸爸讓我養孔雀魚，爸爸也很快回家拿出網子，撈幾下就看到數不盡的魚跑來跑去，花了好久的時間，才撈到幾十尾很不容易，沒想到更不容易的是養魚，因為養魚之前要先養好水，否則，就算撈再多的魚也是白費工夫。果不其然，養了不久原本漂亮的魚兒全部都死了。
有了這次失敗的經驗我才知道要準備過濾器、硝化菌，養魚的水要先曝氯，不能隨便，客諺云:「學問若愛好必先問三老」為學如此，養魚也當有如此的態度，好在水族館的老闆娘有教我如何養好水和魚，加上發達的網路資訊，我慢慢養出心得，後面開始還有養蝦甚至有養過烏龜，不過啊有時候寒流來襲，再耐養的魚也會死亡，夏天太熱也會有影響，養魚也是要看老天爺的臉色的。
現在我養的魚是到目前為止最耐養的魚「蓋斑鬥魚」，是台灣原生種，比較不會因為天氣變化大而死，還有雖然比不上孔雀魚美麗又好看的外表，不過他卻有堅強的生命力，就像我們客家人有硬頸又堅強的精神不畏艱難，努力打拚，有自己的一片藍天。
養魚雖然不簡單，不過只要有耐心，不怕失敗我相信大家也可以很快上手，養出自己的心得喔！