文／曾馨儀，苗栗縣造橋鄉客家人，北科附工客語文支援教師，這下歇桃園市桃園區（四縣腔）
一年一擺个志工參訪，係桃園市政府家庭教育中心志工最期待个日仔。除了做得去交流學習外，又有遶尞个景點，這擺參訪个係臺中家庭教育中心。
打早遊覽車在桃園家庭教育中心大門前个三民路脣等大家上車，在上車進前，還愛入去教育中心簽名報到。車肚這兜共伴仔，儕儕像細人仔樣仔，遊尞正兩日一夜定定，仰恁多大包細包个行李呢？有食个零嗒，啉个涼水，在下層車肚排排等，實在有罅生趣。𠊎做志工个另一個趣味，就係志工參訪學習，見擺遊尞轉來，又會開始期待下二擺个充電个日仔。
頭一站先到「東豐鐵馬道」騎自行車，這係廢忒个舊鐵路，改造个自行車專用道。全程大約仔有13公里零，路項異多个景點，有鐵道月台做个涼亭。
𠊎兜這群「熟女」也學人翕「網美照」，各種後生人會做个姿勢，每一儕人都愛展一下。逐儕搞到歡喜靂天，心肝肚就係想留下靚靚个笑客。還有921大地動留下來个月台斷層公園，係異有時代性个環境教材。像石岡水壩啦、東勢客家文化園區啦，還有這群老細人仔，歸路仔搣鬼搣怪，弄到人險險落下𪘒个笑聲，分這擺个行程變到特別好尞。
自行車箭啊箭仔，路脣兩片青油油仔个樹仔同𠊎揲手相借問。涼沁沁仔个風輕輕仔對面頰卵吹過來，鼻著淡淡个花香，日頭絲穿過樹影，搖啊搖仔，掖落个光影，襯等蟬噭鳥唱，實在樂暢哪！
行程最精彩个所在，係一群願意付出時間精神摎體力个「助人工作者」，無分「推廣活動組」抑係線上諮詢服務个「輔導組」，大家共下分享成長、學習、接受個案个挑戰。
交流个時節，知著臺中市升格了後，服務量一下仔增加幾下倍，佢兜牙根囓等，就像細人仔一夜變大人樣仔。逐儕人就肯㧡起這個擔頭，加長个服務時間、工作量。還有一儕牽一儕个培訓，老手傳新手渡等來，𠊎兜分臺中家庭教育中心个共伴仔，一路行來堅耐个目汁、汗水遰著，鼻空頭酸軟酸軟。
這一路里來，𠊎嗄感覺最靚个風景原來係「人」，同大自然風景融合共下个人情味，係𠊎个最愛。
華語
一年一度的志工參訪，是桃園市政府家庭教育中心，志工們最期待的日仔。除了可以去交流學習，還有旅遊景點可以玩，這次參訪的是臺中家庭教育中心。
一早遊覽車在桃園家庭教育中心，三民路的門口邊等大家上車，在上車之前，還要先去教育中心簽名報到。車內這些夥伴們，個個像孩子般，參訪旅遊才兩天一夜而已，他們大包小包的行李，有吃的零食，喝的飲料，整齊堆放在下層車裡，實在有趣哦。我做志工的另一個目的，就是志工參訪學習，每一次遊玩回來，又會開始期待下一次的充電行程。
第一站先到「東豐鐵馬道」騎自行車，這是荒廢的舊鐵路，改造的自行車專用道。全程大約有13公里多，路上很多的景點，有鐵道月台做的涼亭。
我們這群「熟女」也學人拍「網美照」，各種年輕人會擺弄的姿勢，每一個人都要現一下。每個人玩到歡天喜地，心理面就是想留下美美的笑客。還有921大地震留下來的月台斷層公園，非常有時代性的環境教材。像石岡水壩啦、東勢客家文化園區啦，還有這群夥伴們，一路以來裝神弄鬼的搞笑，讓人笑到下巴都快掉下來了，讓這次的行程變得特別好玩。
輕快地踩著自行車，路邊兩旁綠油油的樹葉向我招手問候。涼涼的微風，輕輕地從臉頰拂過，聞著淡淡的花香，陽光穿過樹梢，搖啊搖啊，灑落的光影，襯著蟬鳴鳥叫，實在快樂啊！
行程最精彩的部分，是一群願意付出時間精神與體力的「助人工作者」，無論是「推廣活動組」還是線上諮詢服務的「輔導組」，大家共同分享成長、學習、接受個案的挑戰。
交流的時候，了解臺中市升格以後，服務量一下子增加好幾倍，服務志工們咬緊牙根，「好像孩子們一夜之間就長大了一樣」。每個人都願意擔起這個責任，加長的服務時間、工作量。還有一人牽一人的訓練，老手帶著新手，我們被臺中家庭教育中心的夥伴們，一路走來辛苦堅難的淚水、汗水感動，鼻頭都酸酸的。
在這段行程當中，我突然感覺最美麗的風景原來是「人」，與大自然風景共同融合的人情味，是我的最愛。