文／劉菊英
桃園龍潭客家人，客語文薪傳師、社大講師、國小客語先生。
吾老公屋下係佃農，犁田、耙田、打碌碡項項都愛有牛來𢯭手，故所有畜兩條牛，一條牛嫲還有一條細牛牯，細牛牯當好停動，長透飆上飆下。平常時屋下人會去掌牛，若堵著緊工就會䌈在樹下，索仔放到長長，分佢自由食草。
有一擺田愛挲草當無閒，打早家娘就牽牛到崗頂，䌈到樹下分佢兜食草，家官暗昏正去牽轉來。吂知，去到崗頂只伸著牛嫲，細牛牯嗄毋見忒哩！家官、家娘摎吾老公分路去尋，該央時𠊎正嫁來無幾久，對莊頭無熟，家娘喊𠊎留在屋下。
𠊎歇个莊頭淨有五戶人家，歸路無路燈暗冬冬。鄰舍雖然隔無幾遠，大聲喊還聽得著，毋過敗勢去勞攪人。除忒𠊎全都出去尋牛，𠊎一儕人孤孤栖栖在屋下。屋肚單淨有一盞五燭个電火，暗摸叮咚盡得人驚，屋外背無月光、無星仔，伸手不見五指。𠊎兩隻腳𨃰在門檻項，毋敢行入，又毋敢行出外背去，越想越驚！時間就像凝凍樣，長到像過了一世紀。
總算，屋下人陸陸續續轉來，但係全都頭犁犁，唉唉唧唧，無尋著細牛牯！該一夜，全家都睡毋落覺，掛心細牛牯。第二日，𠊎兩公婆都愛去上班，淨伸家官、家娘繼續尋到半夜，還係無尋著 ，又係一夜難眠。第三日係禮拜日，雨落異大，十點零有一個耕田阿伯著等簑衣、戴等笠嫲，牽等𠊎屋下毋見忒个細牛牯！佢遠遠就問：「這條牛仔係你兜个無？𠊎天一光就牽等牛，歸路仔問人，聽講係你兜个牛打毋見，正一路尋到若屋下。佢又講：佢歇在「員樹林」，行三、四點鐘正將牛送轉來。
家官聽著，遽遽走兼去摸細牛个頭那講：你這隻綻剁頭，𠊎兜尋你尋幾下日吔！細牛遽遽走到牛嫲身邊，哞哞滾緊噭，盡像在該做嬌樣。阿伯看著牛仔兩子哀相認，歡喜到耐毋得。家官隨手拿出兩千個銀愛答謝佢，毋過，阿伯連連搖手講：「毋使、毋使，正經毋使。續下來用學老話講：「三八啦！咱是厝邊」，一定愛互相𢯭手正好。
看該央時个人，雖然歇在當遠，還講𫣆係鄰舍。逐擺若想著阿伯行恁遠个路，單淨係愛摎牛送轉分𠊎兜，這份人情永久毋敢添放忒，乜愛輒輒講阿伯个善心摎愛心分細人聽。
華語
我先生家事佃農，犁田、耙田、打碌碡樣樣都需要有來幫忙，所以有養兩頭牛，一頭是牛媽媽，還有一頭牛兒子，小牛很好動，常常飆來飆去。平常家人會去看牛，農忙期就會綁在樹下，繩仔放很長讓它們自由吃草。
有一次田要除草很忙，一早婆婆就牽牛到山上，綁在樹下讓它們吃草，公公傍晚才去牽回來。怎知，到山上只剩牛媽媽，小牛竟然不見了！公公、婆婆和先生分頭去找，那時我才嫁過來不久，對這裡環境不熟，婆婆叫我留在家裡。
我住的村莊只有五戶人家，整條路沒又路燈暗摸摸。鄰居雖然隔不遠，大聲喊還聽得到，不過不好意思麻煩人家。除忒我全家都出去尋找小牛，我一個人孤零零在家。房子裡只有一盞五燭的電燈，黑古隆咚非常可怕，屋外沒有月亮、沒有星星，伸手不見五指。我兩隻腳跨在門檻兩旁，不敢進入屋內，又不敢走出外面，越想越怕！時間就像被凍住，長到像過了一世紀。
總算，家人陸陸續續回來，但全都頭低低，唉聲嘆氣，沒有找到小牛！那夜，全家都睡不著，掛心小牛。第二天，我夫妻都去上班，只有公公、婆婆繼續找尋到半夜，還是沒有找著 ，又是一夜難眠。第三日是星期日，雨落蠻大，十點多有一個耕田阿伯川著簑衣、戴著笠帽，牽等我家不見的小牛。他遠遠的就問：這條牛是你們的嗎？我天一亮就牽等牛，一路尋問人，聽說你們家牛不見了，就延路找到你們家。他又說：他住在「員樹林」，走了三、四小時才將牛送回來。
公公聽了，趕緊走過去摸小牛的頭說：你這隻頑皮牛，我們門找你好幾天了！小牛趕緊走到牛媽媽身邊，哞哞叫，好像是在撒嬌。阿伯看到牛母子團圓，非常歡喜。公公隨手拿出兩千元要答謝他，不過，阿伯連連搖手說：「不用、不用，真的不用。接著用閩南語說：「三八啦！我們是鄰居」，一定愛互相幫忙才好。
看那時的人，雖然住家離得很遠，還說我們師鄰居。每當想起阿伯走這麼遠的路，只為要將牛送回給我們，這份恩情永遠不敢忘記，也要常講阿伯的善心和愛心分孩子們聽。